शुक्रबार, ६ मंसिर, २०८२
शुक्रबार, ६ मंसिर, २०८२
राष्ट्रिय सन्देश संबाददाता, शुक्रबार, ३१ श्रावण, २०८२
२०८२ साउन ३०, रामेछाप । अपर तामाकोशी हाइड्रोपावर लिमिटेड अन्तर्गतको माथिल्लो तामाकोशी जलविद्युत् केन्द्रले भोली शनिबार तामाकोशी तथा सुनकोशी नदी किनारमा विशेष सतर्कता अपनाउन आग्रह गरेको छ ।
कम्पनीका अनुसार साउन ३१ गते शनिबार बिहान ५ बजेदेखि राति ८ बजेसम्म दोलखा जिल्लाको विगु गाउँपालिका–१ मा अवस्थित ४५६ मेगावाट क्षमताको सो जलविद्युत् केन्द्रको जलाशय सफा (रेजर्भोयर फ्लसिङ) गर्ने भएकोले सतर्कताको लागि अनुरोध गरिएको छ ।
सो अवधिमा तामाकोशी नदीमा माछा मार्ने, नुहाउने, पौडी खेल्ने, लुगा धुने, बस्तुभाउ लैजाने, गिटी–बालुवा निकाल्ने, गाडी तार्ने जस्ता कार्य नगर्न-नगराउन तथा नदी किनारमा परम्पराअनुसार मृतकहरूको दाहसंस्कार वा धार्मिक संस्कार गर्नुपरे अत्यन्त सावधानीका साथ मात्र गर्न अनुरोध गरिएको छ ।
यसै सन्दर्भमा, जिल्ला प्रशासन कार्यालय रामेछापले पनि सार्वजनिक सूचना जारी गर्दै नदी किनारमा माछा मार्ने, पौडी खेल्ने, लुगा धुने, गाडी तर्ने, बालुवा–गिट्टी निकाल्ने जस्ता गतिविधिहरू नगर्न समेत आग्रह गरेको छ । साथै, धार्मिक संस्कार वा मृतकको दाहसंस्कार गर्नुपर्दा सावधानीपूर्वक गर्न अनुरोध गरिएको छ ।
यस अवधिभर तामाकोशी बाँधको तल्लो तटीय क्षेत्रमा पर्ने लामाबगर, छेतछेत, गोंगर, जगत, टुनिटार, जामुने, भोर्ले, सिंगटी, नयाँ पुल, किर्ने, खिम्ती हुँदै सुनकोशी नदीको दोभानसम्म पानीको सतह बढ्ने–घट्ने चक्र रहने भएकाले सतर्क रहन आग्रह गरिएको हो ।
प्रशासनले जारी गरेको सुचना पढ्नुहोस
अपर तामाकोशी हाइड्रोपावर लिमिटेडले जारी गरेको सुचना पढ्नुहोस
