शनिबार, ९ जेष्ठ, २०८३
शनिबार, ९ जेष्ठ, २०८३
राष्ट्रिय सन्देश संबाददाता, सोमबार, १८ फाल्गुन, २०८२
२०८२ फागुन १८, बुटवल । नेपाल कम्युनिष्ट पार्टी (एमाले)मा विभिन्न वामपन्थी पृष्ठभूमिका नेता-कार्यकर्ता तथा युवाहरूको ठूलो संख्या सामूहिक एमालेमा प्रवेश गरेका छन् ।
संयोजक भोजप्रसाद श्रेष्ठको संयोजकत्व र सहसंयोजक राजु गुरूङको समन्वनमा आयोजित कार्यक्रममा ६५० जना युवासहित विभिन्न तहका नेताहरू एमालेमा प्रवेश गरेका हुन् ।
कार्यक्रममा पार्टीका उपाध्यक्ष विष्णु प्रसाद पौडेलले नवप्रवेशीहरूलाई स्वागत गर्दै पार्टी सदस्यता प्रदान गरेका थिए । उपाध्यक्ष पौडेलले देशविरोधी र अस्थिरता फैलाउने शक्तिहरू सक्रिय भइरहेको सन्दर्भमा वामपन्थी मूलधारलाई अझ सशक्त बनाउनु आवश्यक रहेको बताए । उनले राष्ट्रको स्वाधिनता, स्थिरता र विकासका लागि एमाले नै विश्वासिलो शक्ति भएको दाबी गरे । “वाम आन्दोलनलाई टुक्रयाउने र राष्ट्रलाई कमजोर पार्ने प्रयास भइरहेको छ । यस्तो बेला मूलधार सुदृढ बनाउनु समयको माग हो,” उनले भने । उनले यसरी पार्टीमा समाहित हुनेलाई उचित जिम्मेवारी दिने जनाए ।
एमालेमा समाहित हुनेहरूले विगतका राजनीतिक विद्रोह र विभाजनले अपेक्षित परिणाम नदिएको स्वीकार गर्दै अब संगठित वामपन्थी शक्तिको निर्माणमार्फत मुलुकको रक्षा र विकासमा योगदान गर्ने प्रतिबद्धता जनाएका छन् । उनीहरूले हिजोका असन्तुष्टि र आन्दोलनले दीर्घकालीन उपलब्धि दिन नसकेको निष्कर्षसहित एमालेको मूलधारमा फर्किएको बताएका छन् । पार्टी प्रवेश गर्नेहरूमा चिनबहादुर गुरूङ (पूर्व नेकपा प्रदेश सदस्य), बुटवलका सचिव लोकराज शर्मा, चिरन्जीवि अधिकारी, इन्द्र राई, इश्वर गुरूङ, बुटवल-१ का अध्यक्ष नरेन्द्र बस्नेतका छोरा सजित बस्नेतलगायत रहेका छन् ।
वडा नम्बर १ का अध्यक्षका छोरा सजित बस्नेतसहित ठूलो संख्यामा युवा एमालेमा समाहित भएका हुन् । कार्यक्रममा बोल्ने वक्ताहरूले राष्ट्रियता, सुशासन र समृद्धिको एजेण्डालाई केन्द्रमा राखेर संगठन विस्तार अभियानलाई तीव्रता दिने बताएका थिए । नवप्रवेशी युवाहरूले स्थानीय तहदेखि प्रदेश र संघीय राजनीतिसम्म एमालेको नेतृत्व सुदृढ बनाउन सक्रिय भूमिका खेल्ने प्रतिबद्धता व्यक्त गरेका छन् ।
नेता चिनबहादुर गुरूङले वामपन्थी शक्ति बलियो बनाउन एमालेमा समाहित भएको जनाए । एमालेले पछिल्लो समय देशव्यापी रूपमा पार्टी एकता तथा प्रवेश अभियानलाई तीव्र बनाएको जनाएको छ । बुटवलमा भएको यो सामूहिक प्रवेशलाई संगठन विस्तार र वामपन्थी ध्रुवीकरणका दृष्टिले महत्वपूर्ण रूपमा हेरिएको छ ।
