बुधबार, २१ आश्विन, २०८३
बुधबार, २१ आश्विन, २०८३
राष्ट्रिय सन्देश संबाददाता, सोमबार, १९ आश्विन, २०८३
२०८३ असोज १९ काठमाडौँ I नेपाली कांग्रेसको १५औँ महाधिवेशनअन्तर्गत दोस्रो दिन आज (सोमबार) देखि नयाँ नेतृत्व चयन र नीतिगत छलफलको औपचारिक प्रक्रिया सुरु भएको छ ।
आइतबार ऐतिहासिक खुलामञ्चमा भव्य उद्घाटन सत्र सम्पन्न भएसँगै आज भृकुटीमण्डप परिसरमा महाधिवेशनका सांगठनिक तथा निर्वाचनसम्बन्धी गतिविधिहरू अघि बढेका हुन् ।
महाधिवेशन आयोजक समितिले भृकुटीमण्डपस्थित ठूलो हलमा बिहान ७ः३० देखि ९ बजेसम्म देशभरबाट आएका ४ हजार ७ सयभन्दा बढी महाधिवेशन प्रतिनिधिहरूका लागि बिहानी खाजाको व्यवस्था गरेको थियो । खाजापश्चात बिहान सवा ९ बजेदेखि तय गरिएका तीनवटा छुट्टाछुट्टै हलहरूमा बन्दसत्रको औपचारिक कारबाही प्रारम्भ भएको छ ।
सुरु भएको बन्दसत्रमा पार्टी सभापति गगन थापाका तर्फबाट सांगठनिक प्रतिवेदन पेस गर्ने कार्यक्रम छ । प्रतिवेदन प्रस्तुत भएलगत्तै पार्टीको आगामी नीति र संरचनागत सुधारलाई लिएर विधान संशोधन सम्बन्धी प्रस्ताव प्रस्तुत गरी प्रतिनिधिहरूबिच विस्तृत छलफल अघि बढाइने जनाइएको छ ।
बन्दसत्रका दौरान प्रतिनिधिहरूलाई सहज होस् भन्ने उद्देश्यले दिउँसो साढे ११ बजे खानाका लागि समय निर्धारण गरिएको छ ।
नीतिगत छलफलसँगै नयाँ केन्द्रीय कार्यसमिति चयनका लागि केन्द्रीय निर्वाचन समितिले उम्मेदवारी दर्ताको कार्यतालिका सार्वजनिक गरिसकेको छ । जसअनुसार दिउँसो १ बजेदेखि साँझ ६ बजेसम्म भृकुटीमण्डप नजिकै रहेको राष्ट्रिय सभागृहमा विभिन्न पदका आकांक्षीहरूले आफ्नो उम्मेदवारी दरखास्त दर्ता गराउन सक्नेछन् ।
पार्टीभित्र सभापति, पदाधिकारी तथा केन्द्रीय सदस्य पदका लागि विभिन्न गुट र युवा पुस्ताका नेताहरूबिच उम्मेदवारी घोषणा गर्ने होडबाजी चलेको छ । उम्मेदवारी मनोनयन दर्ता सकिएपछि निर्वाचन समितिले दाबी-विरोध र अन्तिम नामावली प्रकाशन गरी मतदानको प्रक्रियातर्फ महाधिवेशनलाई अघि बढाउनेछ ।
